لە درێژەی کۆبوونەوەکان وتاوتوێ کردنی کێشەی قوتابیان و مامۆستایان و رۆڵی توێژەری کۆمەڵایەتی لە دەستنیشانکردن و چارەسەرکردنی کێشەکانی قوتابیان و مامۆستایان دەزگای ڕوانگە بە هەماهەنگی وەزارەتی کار و کاروباری کۆمەڵایەتی و وەزارەتی پەروەردە و بەشی کاری کۆلێژی ئاداب سازی کردبوو.
کۆبوونەوەی ئەمجارە تایبەت بوو بە داخوازییەکانی توێژەرە کۆمەڵایەتییەکان لە قوتابخانەکان و وەزارەتی پەروەردە کە نزیکەی ٥٥ بەڕێوەبەری قوتابخانەکانی شاری هەولێر تیایدا ئامادەبوون بۆ ئەوەی لە نزیکەوە گوێبیستی خواست و پێداویستییە رۆژانەییەکان و زانستییەکانی توێژەرە کۆمەڵایەتییەکان بن لە نێو قوتابخانەکاندا، بۆ ئەوەی رۆڵی کارا بگێرن لە دەستنیشان کردنی کێشەی قوتابیان و مامۆستاکان و دەستنیشان کردنی رێگە چارەی گونجاو.
توێژەرەکان چەند داواکاری و خواستێکیان پێشکەش کرد و لە کۆتایی کۆبوونەوەکەدا بە زۆرینەی دەنگ داواکاری و خواستەکان پەسند کران و لە وەزارەتی پەوردەوەی حکومەتی هەرێمی کوردستان بڕیاری جێبەجێکردنی بۆ دەردەچێت و تاوەکو لە سەرجەم قوتابخانەکانی کوردستان کاری پێبکرێت و رۆڵی گرنگی تویژەرە کۆمەڵایەتییەکان زیاتر کارا بکرێت.
بەشێک لە خواستی توێژەرەکان بریتیبوون لە:
١. دابین کردنی شوێنی گونجاو بۆ توێژەرەکان
٢. ئاگادار کردنەوەی توێژەر لە هەر کێشەیەک و پشتگیری توێژەر بکرێت لە رووبەرووبوونەوەی هەر مەترسیەک لەسەریان.
٣. سەربەخۆبوون و رێگە نەگرتن لە کارەکانی توێژەر بەپێی خاسیەتی کاری خۆی و تەنها بەرێوەبەر بۆی هەیە بەشداری بکات لە هەرکێشەیەک ئەگەر پێویست بوو.
٤. بەشداری کردنی توێژەر لە بریارە گرنگەکانی قوتابخانە پەیوەست بە قوتابیان و بەشداری پێکردنی توێژەران لە کۆبوونەوەکانی دایکان و باوکان.
٥. دابین کردنی بودجەیەک بۆ توێژەرەکان بۆ راپەراندنی کارەکانیان و دابین کردنی پێداویستییەکانیان.
ئەم خواستانەو چەندین خواستی تری پەیوەست بە کاری توێژەرەکان خرایە بەر باس و لێکۆلینەوە و لەسەر ئەنجامیشدا هەموویان لەلایەن لیژنەوە پەسند کران و چاوەروانی بڕیاری فەرمی وەزارەتی پەروەردە دەکریت.
